hazar zakhm hain dil par jigar pe khae hue
magar mile jo kisi se to muskurae hue

kuchh is ada se wo aae nazar jhukae hue
tamam rah gae shikwe zaban pe aae hue

udhar to saghar-o-paimana wale rahte hain
udhar kahan chale waiz qadam badhae hue

badho kuchh aur ki tariki-e-jafa kam ho
isi tarah se charagh-e-wafa jalae hue

hamein satane se baz aaoge yaqin to nahin
tumhaare kitne hi wade hain aazmae hue

tumhaare tir-e-nazar ko kisi ne kuchh na kaha
hamari aah ko hain dastan banae hue

hamara zikr aur is mai-kade mein ai 'asi'
yahan to shaikh-o-barahman hain dagmagae hue