hazar zakhm mile phir bhi muskuraate hue
guzar gaya hai koi rasta banate hue

wo puchh baitha tha mujh se sabab bichhadne ka
zaban kanp gai us ko sach batate hue

ye kis gunah ka ehsas hai mere dil ko
nigah uthti nahin raushni mein aate hue

azab puchhe koi hum se kam-libasi ka
tamam umr kati hai badan chhupate hue

tumhaare nam ke aansu hain meri aankhon mein
ye baat bhul na jaana mujhe rulate hue