hirs ke bab mein yun khud ko tumhaara kar ke
hath malta hun main apna hi khasara kar ke

ab mere zehn mein bas lazzat-e-duniya hai rawan
thak chuka hun teri ulfat pe guzara kar ke

hum abhi sohbat-e-duniya mein hain masruf magar
koi shab tum ko bhi dekhenge gawara kar ke

hum se khamosh tabiat bhi hain duniya mein ki jo
us ko hi chahte hain us se kinara kar ke

der tak koi na tha rah batane wala
aur phir le gai ek mauj ishaara kar ke