hisar-e-did mein jaga tilism-e-binai
zara jo lau teri sham-e-badan ki tharrai

na jaane kis se bichhadne ke rag-rang hain sab
ye zindagi hai ki furqat ki bazm-arai

sukut-e-bahr mein kis gham ka raaz pinhan tha
bas ek mauj uthi aur aankh bhar aai

ye samt samt takhatub ufuq ufuq taqrir
tera kalam hai mera rafiq-e-tanhai

khirad ki rah jo chala main to dil ne mujh se kaha
aziz-e-man ba-salamat-rawi o baz-ai

uthae sur sarafil dekhta hi raha
bashar ke hath nizam-e-qayamat-arai

kiya tha ji ka ziyan hum ne ek ghazal bhar ko
hazar sher kahe ho saki na bharpai