hisar-e-zat se nikla to phir sanbhal na saka
ana ke bojh se baisakhiyon pe chal na saka

simat gai jo bisat-e-tarab hai tere baad
nashat-e-mahfil-e-yaran mein ji bahal na saka

musafiran-e-rah-e-shauq ye bhi yaad rahe
tilism-e-hosh-ruba se koi nikal na saka

tamam shorish-e-dauran tamam rang-e-nashat
main sang-o-khisht mein khud ko magar badal na saka

'nadim' kaam na aai wo nush-e-khair-khahan
main kaj-kulah zamane ke sath chal na saka