ho gaya hai khun thanda aag do
ek taza ek zinda aag do

lamha lamha kanpta hai mera dil
raat kali khauf gahra aag do

sans lena kis qadar dushwar hai
munjamid hai mera sina aag do

dast-o-pa ko subh tak rakhna hai garm
sard sahra sard khema aag do

baadalon se aasman aalud hai
aur samundar barf-asa aag do

bastiyon ne odh rakha hai kafan
aur yahan har fard murda aag do

mujh mein 'shahid' hujra-e-tarik hai
jism-o-jaan hain sham-e-kushta aag do