ho hi jata hai kisi tarah guzara apna
warna ab shahr mein hai kaun hamara apna

dil ke dariya mein huin gharq tamannaen to kya
mauja-e-khun se hai gul-rang kinara apna

kis qadar sang-e-malamat hai mere chaaron taraf
main ne us dar pe yunhi sar nahin mara apna

ek tamasha hi sahi aaj hawa den is ko
aur kis din ke liye tha ye sharara apna

nam uncha rahe ai pasti-e-duniya tera
hai tere dam se bulandi pe sitara apna