ho na ruswa-e-zamana mah-e-kaamil ki tarah
mere sine mein raho aa ke mere dil ki tarah

tere darwaze pe ai ghairat-e-laila din-raat
sar patakte rahe hum parda-e-mahmil ki tarah

is qadar shauq-e-shahadat ne mujhe daudaya
thak gae panw mere bazu-e-qatil ki tarah

sair nairangi-e-alam ki nazar aa jae
meri aankhon mein agar aa ke raho til ki tarah

ek nazar dekh le munh pher ke o said-afgan
dil tadapta hai mera tair-e-bismil ki tarah

be-tire ai yam-e-khubi jo lage munh se sharab
chhaale pad jaen habab-e-lab-e-sahil ki tarah

wahshat-e-dil se ho kya aashiq-e-gesu ko najat
jada-e-dasht lipatte hain salasil ki tarah

qadr jaanoge mohabbat ki tab ai jaan-e-jahan
tum bhi jab ranj uthaoge mere dil ki tarah

aap khul khele agar mujh se shab-e-wasl to kya
na khuli dil ki girah uqda-e-mushkil ki tarah

rang lae jo mera khun-e-tamanna 'wahbi'
daman-e-hashr bane daman-e-qatil ki tarah