hosh mein aaen to kya hosh mein aae na bane
be-khudi apni wo parda ki uthae na bane

chaak-e-dil chaak-e-jigar chaak-e-gareban mat dekh
mujh se yun lut ke tere samne aae na bane

na-umidi ka sukun bhi meri qismat mein nahin
sham-e-umid bujhaun to bujhae na bane

hum to nakaam palat aaen pa ai jaan-e-hayat
na-muradana teri bazm se aae na bane

hae wo lauh-e-jabin aur wo tahrir-e-wafa
kis tarah us ko bhulaun ki bhulae na bane

apni nakaam mohabbat pe pasheman hun 'payam'
zist se aankh milaun to milae na bane