hosh us ka hai be-khudi us ki
zindagi ki har ek ghadi us ki

dur tak malgaja sa sannata
aur aahat kabhi kabhi us ki

ishq mera hai sufiyon jaisa
sirf matlub hai khushi us ki

dil ko honton se dur rakhta hai
mar dalegi khamushi us ki

tirgi chha rahi hai har jaanib
bewafai hai sham si us ki

dekh kar khush-guman hua hai dil
garm-joshi kamal ki us ki

ham-safar jis ka khub-sirat ho
khub-surat hai zindagi us ki

khwab mein dil-nawaziyan 'jawed'
aur haqiqat hai be-rukhi us ki