hua hai mujh pe kuchh aisa asar us ke tabassum se
hua gulzar hai mera safar us ke tabassum se

wo halki muskurahat aur kinare pe wo kala til
nahin hatti zamane ki nazar us ke tabassum se

yaqin hai mujh ko us ka koi bhi sani nahin hoga
hua nayab hai wo is qadar us ke tabassum se

bachae dubne se ab koi khud ko bhala kaise
bane jo gal par qatil bhanwar us ke tabassum se

kabhi puchhen agar ahl-e-jahan jo us ke bare mein
kahunga main ki hoti hai sahar us ke tabassum se