hua shu'ur to khud-agahi ke par nikle
fasil-e-zat mein khush-fahmiyon ke dar nikle

main apne qatl ka ilzam kis ke sar rakhta
jab apne hath hi apne lahu mein tar nikle

teri talash mein aksar safir yaadon ke
rida-e-khwab sar-e-sham odh kar nikle

huin daraaz jo mehr-e-sahar ki shamshiren
tamam jismon ke sae burida-sar nikle

jinhen talash thi shadab-o-sabz mausam ki
unhin ki rah mein sukhe hue shajar nikle