hum ahl-e-fan nahin hain ya ahl-e-sukhan nahin
kya anjuman hamari koi anjuman nahin

ye inqilab-e-waqt ki sazish hai in dinon
hum baghban bhi ho ke hamara chaman nahin

kab tak bahega khun yahan insaniyat ka dost
ye dushmanan-e-amn ka achchha chalan nahin

hum par uthae ungliyan duniya agarche hum
pahne hue to aisa koi pairahan nahin

kitni ajib baat hai hum ajnabi se hain
rah kar watan mein phir bhi hamara watan nahin

ghabra ke hadson se kahan jaoge 'amin'
wo kaun si jagah hai ki jo pur-fitan nahin