hum jo guzre un ki mahfil ke qarib
ek kasak si rah gai dal ke qarib

sab ke sab baithe the qatil ke qarib
be-kasi thi sirf bismil ke qarib

zindagi kya thi ajab tufan thi
ab kahin pahunche hain manzil ke qarib

is qadar khud-rafta-e-sahra hue
bhul kar dekha na mahmil ke qarib

hae us mukhtar ki majburiyan
jis ne dam toda ho manzil ke qarib

zindagi-o-maut wahid aaina
aadmi hai hadd-e-fasil ke qarib

ye tajahul aarifana hai janab
bhul kar jaana na ghafil ke qarib

tarbiyat ko husn-e-sohbat chahiye
baithiye ustad-e-kaamil ke qarib

hosh ki kahta hai diwana sada
aur mayusi hai aaqil ke qarib

dekhiye un bad-nasibon ka maal
wo jo dube aa ke sahil ke qarib

chhai hai 'gulzar' mein fasl-e-khizan
phul hain sab gul shamail ke qarib