hum ko kuchh yaad nahin tere siwa bhul gae
apni surat hi nahin apni sada bhul gae

kucha-e-chashm ke sab naqsh o nawa bhul gae
hum pe wo waqt pada shor-e-ana bhul gae

main akela hi raha barg-o-samar se khali
mausam-e-gul mein mujhe mere khuda bhul gae

maut aur hijr-e-musalsal mein koi farq nahin
tu to phir tu hai hum apni wafa bhul gae

ab ke yun rakh hua manzar-e-ahu-chashman
dasht ai dasht teri pichhli hawa bhul gae

itna bikhra hua lahja yahan 'lutf-ur-rahman'
aap bhi apni wo kuchh tarz-e-ada bhul gae