mujhe ujlaton mein na padh zara mujhe waqt de
main hun muddaton mein likha hua mujhe waqt de

mujhe hosh aane de ham-safar main hun be-khabar
mujhe waqt de abhi thahar ja mujhe waqt de

mujhe aab-o-dana-e-hosh de abhi sabr rakh
wo zamin-e-aql pe ug raha mujhe waqt de

koi shakl de mujhe ai musawwir-e-dil-figar
mujhe canwas pe utar aa mujhe waqt de

gham-e-ishq mujh ko muaf kar ki main hun abhi
gham-e-rozgar mein mubtala mujhe waqt de

mujhe rakh ke chaak pe bhul mat mere kuza-gar
mere khal-o-khad bhi bana zara mujhe waqt de

mujhe hairaton se nikal de mujhe chhu ke dekh
mere yar hosh mein aa zara mujhe waqt de