hum ko malum hai baaton ki sadaqat teri
log kya kya nahin karte hain shikayat teri

malka-e-husn nahin phir bhi tu ai jaan-e-wafa
achchhi lagti hai bahut hi mujhe surat teri

koi mushkil bhi ho khatir mein na late the kabhi
hausla kitna badhati thi rifaqat teri

tu hi batla ki bhala tujh ko bhulaen kyun kar
samne aankhon ke aa jati hai surat teri

kya kahen hum ki guzar jati hai dil par kya kya
yaad aati hai jo rah rah ke inayat teri

log kya sada hain ummid-e-wafa rakhte hain
jaise malum nahin un ko haqiqat teri

ab kahan rahta hai kya karta hai 'nadir' mere
muddaton baad nazar aati hai surat teri