hum tah-e-dariya tilismi bastiyan ginte rahe
aur sahil par machhere machhliyan ginte rahe

na-tawan shanon pe aisi khamushi ka bojh tha
apne us ke darmiyan bhi sidhiyan ginte rahe

bazm-e-jaan se chupke chupke khwab sab rukhsat hue
hum bhala karte bhi kya bas gintiyan ginte rahe

bans ke jangal se ho ke jab kabhi guzri hawa
ek sada-e-gumshuda ki dhajjiyan ginte rahe

kis hawa ne das liya hai rang o roghan ud gae
sehn-e-dil se is makan ki khidkiyan ginte rahe

pahlu-e-shab kal isi chehre se raushan tha magar
jaane kitne mausamon ki talkhiyan ginte rahe