hum talkhi-e-hayat ko aasan na kar sake
sahrai-zindagi ko gulistan na kar sake

tha zoam jin ko apni masihai ka yahan
wo bhi ilaj-e-sozish-e-pinhan na kar sake

waraftagi-e-shauq mein shal ho gae badan
aabid tawaf-e-kucha-e-jaanan na kar sake

kuchh yun chali thi baad-e-hawadis ki ki umr-bhar
qindil-e-arzu ko farozan na kar sake

aalam-e-ashiqi ne kiya khud se be-khabar
hum tazkira-e-sakhti-e-dauran na kar sake

aisa chubha hai nashtar-e-bedad-e-arzu
hum zindagi mein phir koi arman na kar sake

baad-e-nasim ab ke 'muzaffar' ajib thi
hum ehtimam-e-subh-e-bahaaran na kar sake