hum the kisi ka dhyan tha wo bhi nahin raha
ek rabt-e-jism-o-jaan tha wo bhi nahin raha

jhagda tha mera jis se wo duniya kidhar gai
ek shakhs darmiyan tha wo bhi nahin raha

misl-e-charagh tirgi-e-jism-o-jaan mein dil
ek shahr-e-be-nishan tha wo bhi nahin raha

inten bichhi thin jis mein wo ek tang si gali
us mein mera makan tha wo bhi nahin raha

duniya meri nahin na sahi tum to sath ho
kya kya hamein guman tha wo bhi nahin raha

nuqta bani nigah se ojhal hui zamin
sar par ek aasman tha wo bhi nahin raha

'mushaf' tumhaara nam yahin tha aur us pe han
ek surkh sa nishan tha wo bhi nahin raha