hum se guftugu aise de koi bayan jaise
qaede ke lafzon ko mil gai zaban jaise

dosti ki ye manzil hai wabaal-e-jaan kitni
baat baat par abru khinch gae kaman jaise

baat-chit yaron se pul-siraat par chalna
lafz milta rahta hai bazm ho dukan jaise

dekhta hun chehron ko main talash mein apni
naqsh khub ghairon ke hon mera nishan jaise

yun sambhaal kar rakh li dil mein dhul yaadon ki
karwan ki manzil ho gard-e-karwan jaise