suno to aariza-e-ikhtilaj rahne do
sukun ke thik nahin hain mizaj rahne do

ba-hukm-e-shah taqarib-e-amn kal honge
sharar-gazida hai mahaul aaj rahne do

tum apni nabz ki raftar par nazar rakkho
khilaf-e-gardish-e-nau-ehtijaj rahne do

kisi ko saya kisi ko gul-o-samar dega
hara bhara hai darakht-e-riwaj rahne do

zamin-e-fikr-o-hunar banjh hai abhi 'rahi'
husul-e-dad wasul-e-khiraj rahne do