hum se wafa karen ki wo hum par jafa karen
paen khuda se hum jo buton se dagha karen

sayyaad uda diya mujhe sar se utar kar
sadqe tere huma tere sar par uda karen

wo din khuda dikhae ki hum bhi unhen sataen
ye naznin hasin hamara gila karen

aankhon mein ashk aae to hansne ka lutf kya
itna na gudgudao ki hum ro diya karen

samjha de ja ke tu hi unhen ai nigah-e-yas
ab kosne ka waqt nahin hai dua karen

rakh len hum aap lao dil-e-be-qarar mein
aisa na ho ki tir tumhaare khata karen

hum lakh parsaon ke ek parsa sahi
mauqe se tum ko paen to batlao kya karen

pazhmurda phul ban ke rahe na-murad dil
khil kar tumhaare haar ki kaliyan hansa karen

wo din kahan 'riyaz' wo raaten kahan 'riyaz'
baithe hue kisi ki balaen liya karen