hunuz raat hai jalna padega us ko bhi
ki mere sath pighalna padega us ko bhi

durust hai ki wo mujh se gurez-pa hai magar
girunga main to sambhalna padega us ko bhi

atut dosti nisbat talluqat wafa
ye kaisi aag mein jalna padega us ko bhi

kisi bhi tarah se is pyar ko nibhana hai
ab apna aap badalna padega us ko bhi

mujhe kisi bhi safar pe na jaane dega kabhi
use khabar hai ki chalna padega us ko bhi