husn be-parda hai jalwa aam hai
dekhna ahl-e-nazar ka kaam hai

kuchh nahin hota ba-juz hukm-e-khuda
aadmi to muft mein badnam hai

ab khuda bakhshe na bakhshe kya karun
dil to mera banda-e-asnam hai

dekhiye chaliye nazare rah ke
ye safar bas aur do ek gam hai

ham-nashino ab to mere waste
zindagi tuta hua ek jam hai

dard bhi kuchh dab gaya hai dil ke sath
'nur' is karwat bahut aaram hai