husn-e-imkan rang-e-rukh rang-e-badan zad par raha
kya bataun main tujhe kya kya sajan zad par raha

aql walon par wahan khulte hain az-khud raste
jis gali mein ek mera diwana-pan zad par raha

har sukhan ko tolta hun bolta hun munh se phir
jaane kyon phir bhi mera zauq-e-sukhan zad par raha

ho rahi hai is tarah tajdid har ek khwab ki
jo bacha tha aankh mein aks-e-kuhan zad par raha

ishq par hone lagi hain tohmaton ki yurishen
husn-e-be-parwa se chaak-e-pairahan zad par raha