husn-e-sad-rang se firdaus ba-daman nikla
hum ne jis phul ko dekha wo gulistan nikla

ho gae dad-talab aur balaon mein asir
hashr ek silsila-e-zulf-e-pareshan nikla

aur kya shai hai ye mearaj-e-mohabbat ke siwa
aarzu aap ki ho kar mera arman nikla

khak mein gardish-e-dauran ne milaya mujh ko
aur is par bhi main sar-halqa-e-dauran nikla

uf re ye jazba-e-khuddar 'munawar' ki numud
ek ajab shan ka shair ye sukhan-dan nikla