husn-e-shokh-chashm mein nam ko wafa nahin
dard-afrin nazar dard-ashna nahin

nang-e-ashiqi hai wo nang-e-zindagi hai wo
jis ke dil ka aaina tera aaina nahin

aah us ki be-kasi tu na jis ke sath ho
hae us ki bandagi jis ka tu khuda nahin

haif wo alam-nasib jis ka dard tu na ho
uf wo dard-e-zindagi jis ki tu dawa nahin

dost ya aziz hain khud-farebiyon ka nam
aaj aap ke siwa koi aap ka nahin

apne husn ko zara tu meri nazar se dekh
dost! shash-jahat mein kuchh tere siwa nahin

be-wafa khuda se dar tana-e-wafa na de
'tajwar' mein aur aib kuchh hon be-wafa nahin