husn kaisa ishq bhi ruswa hua
yun taqaza-e-junun pura hua

kam-nigahi ka teri shikwa nahin
apni aankhen khul gain achchha hua

ruh yun nikli tere bimar ki
jaise bujh jae diya jalta hua

rakh liya musa ne jalwon ka bharam
hosh kho baithe bahut achchha hua

saghar-e-jam se to nakhwat badh gai
saqiya jam-e-sifalin kya hua

hum ba-qadr-e-zarf pi kar jab uthe
daur-e-mai bhi ruk gaya chalta hua

khar-ha-e-dasht hi se puchh lo
hashr jo kuchh aabla-pa ka hua

bahr-e-gham ki nazr lakhon ho gae
aaj tak ubhra koi duba hua

ab 'riyazi' lutf-e-mai-noshi kahan
hai nizam-e-maikada badla hua