husn khud mein na hua jalwa-numa mere baad
ras kya aati zamane ki hawa mere baad

myan se nikli na shamshir-e-jafa mere baad
raqs-e-bismil ka tamasha na hua mere baad

pas-e-dastur na saqi ko raha mere baad
dar-e-mai-khana khula chhod diya mere baad

ek mere uthne se dil baith gaya rindon ka
jam uthe aur na shisha hi jhuka mere baad

har qadam duri-e-manzil ki taraf le ke gaya
rasta bhul gae rah-numa mere baad

bar-e-ehsan se dab jae na turbat 'azad'
chadar-e-gul se na marqad ko saja mere baad