husn masum nahin ishq pe ilzam ke baad
aap ka nam bhi aata hai mere nam ke baad

hai yahi aalam-e-mearaj-e-mohabbat shayad
ab koi nam nahin lab pe tere nam ke baad

ab mohabbat ki tumhein laj to rakhni hogi
log lete hain tera nam mere nam ke baad

na-muradi se mere dil ki khalish kam na hui
tishnagi aur badhi hasrat-e-nakaam ke baad

uljhanen ishq mein kuchh aur bhi badh jati hain
kabhi aaghaz se pahle kabhi anjam ke baad

main khatawar-e-mohabbat sahi lekin ai dost
zindagi aur nikhar aai is ilzam ke baad