husn par jab shabab aata hai
ek naya inqalab aata hai

un ko bheja hai aaj nama-e-shauq
dekhiye kya jawab aata hai

meri aankhon mein dekh kar aansu
un ko mujh par itab aata hai

be-naqab un ko dekhne ke liye
raat ko mahtab aata hai

talib-e-did dars-e-ulfat len
imtihan mein ye bab aata hai

aap jo bhi sawal puchhenge
mujh ko us ka jawab aata hai

qabr par meri gul chadhane ko
wo barae-sawab aata hai

tauba karte raho gunahon se
shaitanat se azab aata hai

raat mein din 'aziz' niklega
aisa ek aaftab aata hai