ibarat is mein har ek be-naqab meri hai
likha hai nam tumhaara kitab meri hai

gulab tod ke zinat bana lo daman ki
na khao khauf ye shakh-e-gulab meri hai

ye mai-kada ye hasin jam go tumhaare hain
jo pi rahe ho maze se sharab meri hai

bhatak na jae kahin asp-e-ishq rahon se
dua labon pe tere ham-rikab meri hai

wo tut kar nahin girte zamin par na sahi
sitare charkh ke hain aab-o-tab meri hai

main harf harf mein us ke basa hun dhadkan sa
koi bhi kah le khushi se kitab meri hai