idhar se bhi to hawa-e-bahaar guzri hai
kuchh ek bar nahin bar bar guzri hai

gila nahin ye faqat arz-e-haal hai ai dost
tere baghair bahut be-qarar guzri hai

wahi to meri hayat-e-safar ki punji hai
wo zindagi jo sar-e-rahguzar guzri hai

qalam liye hue socha kiye ki kya likhen
kuchh is tarah bhi shab-e-intizar guzri hai

bhula sakenge na us ko qafas mein ai sayyaad
wo do ghadi jo sar-e-shakh-sar guzri hai

kabhi kabhi to meri bar-mahal khamoshi bhi
unhen fughan ki tarah nagawar guzri hai

huin jo dil se mere bad-gumaniyan un ko
to shairi bhi meri nagawar guzri hai

khizan mein bhi na kisi ki khuda kare guzre
wo jis tarah meri fasl-e-bahaar guzri hai

ubhar gai hai kahin par 'raza' jo talkhi-e-fikr
mere mizaj-e-ghazal par wo bar guzri hai