idhar se jhankte hain gah udhar se dekh lete hain
gharaz hum us ki surat sau hunar se dekh lete hain

kiya hai bakht ne jis din se hum ko us ka ham-saya
hum us rashk-e-pari ko apne ghar se dekh lete hain

jo ho jate hain diwane tere itne naqabon par
khuda jaane ki wo tujh ko kidhar se dekh lete hain

hamein girya se wo fursat kahan jo khal-o-khat dekhen
magar naqsha tera is chashm-e-tar se dekh lete hain

hamare dekhne se kyun khafa hota hai ai zalim
tera lete hain kya tuk ek nazar se dekh lete hain

hamein us ku mein rahne ka nahin kuchh aur to hasil
par itna hai ki gahe chaak-e-dar se dekh lete hain

lagen hain dekhne jab 'mushafi' hum us ke kuche mein
tuk ek phir kar bhi ruswai ke dar se dekh lete hain