ilaj-e-zakhm-e-dil hota hai gham-khwari bhi hoti hai
magar maqtal ki mere khun se gul-kari bhi hoti hai

wahi qatil wahi munsif adalat us ki wo shahid
bahut se faislon mein ab taraf-dari bhi hoti hai

ye hai turfa-tamasha karbala-e-asr-e-hazir ka
gharon mein qatilon ke ab aza-dari bhi hoti hai

talluq un se tuta tha na tuta hai na tutega
bahut mazbut zanjir-e-wafa-dari bhi hoti hai

wo mera dost hai 'manzur' lekin jab bhi milta hai
khulus-e-dil mein shamil kuchh riya-kari bhi hoti hai