insaniyat ke nam ko ruswa na kijiye
mat kijiye bura bhi gar achchha na kijiye

ye moajizon ka daur nahin hai mere huzur
qatil se zindagi ki tamanna na kijiye

parde se khubiyon ke dikhengi buraiyan
insan ko qarib se dekha na kijiye

mat dhaaliye usulon ko sanche mein waqt ke
yun maslahat ki aanch pe pighla na kijiye

khuddariyon ki maut hai khud aadmi ki maut
dast-e-talab ko surat-e-kasa na kijiye

duniya na bhul jae mohabbat ki dastan
'arif' khuda ke waste aisa na kijiye