intiha sabr-azmai ki
hai daraazi shab-e-judai ki

hai burai nasib ki ki mujhe
tum se ummid hai bhalai ki

naqsh hai sang-e-astan pe tere
dastan apni jubba-sai ki

tum se kuchh mil ke khush hua hun ki hun
dahr mein hasrat aashnai ki

hai fughan baad-e-imtihan-e-fughan
phir shikayat hai na-rasai ki

kya na karta visal-e-shadi-e-marg
tum ne kyun mujh se kaj-adai ki

raaz khulte gae mere sab par
jis qadar us ne khud-numai ki

kitne aajiz hain hum ki pate hain
bande bande mein lau khudai ki

rah gain dil mein hasraten 'salik'
aa gai umr parsai ki