iqrar ka matlab ho ki inkar ke mani
koi to ho samjhe meri guftar ke mani

us jaisa koi ho to kahe us ki misalen
ho yar sa koi to kare yar ke mani

ye jism dil-o-jaan to hain bin mange hi tere
phir kya hain tere dast-e-talabgar ke mani

ek wo ki uthata gaya buniyaad barabar
ek main ki samajhta gaya diwar ke mani

bachpan hai jawani hai budhapa hai ye kya hai
marna hi agar hai to phir adwar ke mani

phulon ko phalon ko sar-e-afkar sajaya
yani ki kiye yun lab-o-rukhsar ke mani

jata hai to jate hue dil ko bhi jala ja
jab tu hi na thahrega to ghar-bar ke mani

har chiz yahan apne lawazim ki hai muhtaj
sahab hi na thahroge to dastar ke mani

ai kash ki jis ke liye kahta hun main 'tahir'
wo mujh ko batae mere ashaar ke mani