is ada se koi aaya baam par
ho gaya dhoka sahar ka sham par

hum se kya dekha jo parda kar liya
harf aaya aashiqon ke nam par

ahd kar ke aap hi jab phir gae
zor kya hai gardish-e-ayyam par

shadi-e-be-mani be-illat nahin
mar-mita hun phir kisi gulfam par

kis ko samjha hun teri pahli nazar
mit raha hun lazzat-e-alam par

mar gaya sun kar nawed-e-wasl-e-yar
rahmat-e-haq 'maikash'-e-nakaam par