is darja hai jahan mein shu'ur-e-baqa mujhe
chhute hue larazta hai dast-e-fana mujhe

meri nigahon mein wo safar zindagi ka hai
manzil har ek jis ki hai manzil-numa mujhe

kuchh dur mere sath chale shaikh-o-barhaman
aur aage phir mila na kisi ka pata mujhe

zulmat mein bhi rasai-e-manzil ka hai yaqin
mash'al dikha rahe hain tere naqsh-e-pa mujhe

'rehani' un ko dekh ke mahw-e-khiram-e-naz
har gam par bahaar ka dhoka hua mujhe