milegi shaikh ko jannat hamein dozakh ata hoga
bas itni baat hai jis ke liye mahshar bapa hoga

rahe donon farishte sath ab insaf kya hoga
kisi ne kuchh likha hoga kisi ne kuchh likha hoga

ba-roz-e-hashr hakim qadir-e-mutlaq khuda hoga
farishton ke likhe aur shaikh ki baaton se kya hoga

teri duniya mein sabr-o-shukr se hum ne basar kar li
teri duniya se badh kar bhi tere dozakh mein kya hoga

murakkab hun main nisyan-o-khata se kya kahun ya-rab
kabhi harf-e-tamanna bhi zaban par aa gaya hoga

sukun-e-mustaqil dil be-tamanna shaikh ki sohbat
ye jannat hai to is jannat se dozakh kya bura hoga

mere ashaar par khamosh hai jiz-biz nahin hota
ye waiz waizon mein kuchh haqiqat-ashna hoga

bharosa kis qadar hai tujh ko 'akhtar' us ki rahmat par
agar wo shaikh sahab ka khuda nikla to kya hoga