is ghani shab ka sawera nahin aane wala
ab kahin se bhi ujala nahin aane wala

jibrail ab nahin aaenge zamin par hargiz
phir se aayat ka tohfa nahin aane wala

ho gae dafn shab-o-roz purane kab ke
laut kar phir wo zamana nahin aane wala

ped to sare hi be-barg hue jate hain
dhup to aaegi saya nahin aane wala

ye bhi sach hai ki ajal ban ke khade hain amraaz
ye bhi tai hai ki masiha nahin aane wala

hum ko sahna hai akele hi har ek dard ka bojh
khair-khwahon ka dilasa nahin aane wala

mere afkar ke sote nahin thamne wale
meri sochon pe budhapa nahin aane wala

nae lafzon ko baratne ka saliqa bhi to ho
sirf alfaz se lahja nahin aane wala

jhut be-panw bhi daudega bahut tez 'khumar'
lab pe sachchai ka charcha nahin aane wala