is gosha-e-uzlat mein tanhai hai aur main hun
mashuq-e-tasawwur se yakjai hai aur main hun

ya ghar se qadam mera bahar na nikalta tha
ya shahr ki galiyon mein ruswai hai aur main hun

jis dasht mein naqe ka guzra na qadam hargiz
us dasht mein majnun sa saudai hai aur main hun

naseh ki na main manun hamdam ki na kuchh samjhun
is ishq-o-mohabbat mein khud-arai hai aur main hun

har-chand junun-e-ishq hota hai khirad-dushman
ai 'mushafi' is par bhi danai hai aur main hun