is taraf aag ka dariya hai udhar khai hai
hum ne bhi par utarne ki qasam khai hai

apne kamre se nikal kar zara dekho to sahi
dhup diwar se aangan mein utar aai hai

jin charaghon ka tere nam se rishta hi nahin
un charaghon ki zamane mein pazirai hai

raat ki shakh se latke hain sitaron ke charagh
ghar ki dahliz pe baithi hui tanhai hai

aisa mausam hai ki be-barg-o-samar hain ashjar
kyon hawa shor machane ko chali aai hai

dhup ke shahr mein baadal ko tarasne walo
aaj barish nahin hogi ye khabar aai hai

jis pe diwar ke us par ka manzar na khule
aisi binai bhi kis kaam ki binai hai

apne andar ka ye aalam bhi ajab aalam hai
bhid ki bhid hai tanhai ki tanhai hai

mujh pe ilzam hai aahista-khirami ka 'matin'
tez chalta hun to ahbab ki ruswai hai