ishq chhupta nahin chhupane se
faeda kya nazar bachane se

jab qafas mein charagh jalte hain
lau nikalti hai aashiyane se

tark-e-ummid ek bahana tha
kar chuke ye bhi sau bahane se

hoshiyar ai nigah-e-waqt-nawaz
rukh badalte hue zamane se

hasil-e-zikr ho tumhi lekin
ibtida hai mere fasane se

jagna tha hamein ba-kar-e-hayat
soe hain maut ke bahane se

zikr-e-mahbub farz tha 'anjum'
kah liye sher is bahane se