ishq-e-sadiq ne dikhaya ye asar aap se aap
ho gai un ko mere dil ki khabar aap se aap

chashm-e-jaanan ki agar yaad nahin aai hai
aa gae josh pe kyon dida-e-tar aap se aap

kuchh maza pad gaya hai un ko ki be-wajah-o-sabab
wasl ki shab wo kiya karte hain shar aap se aap

khufta-bakhti meri dikhlati hai tasir apni
bajne lagta hai shab-e-wasl gajar aap se aap

na moazzin ne azan di na abhi top chali
dafatan bol utha murgh-e-sahar aap se aap

ba-khuda un ki taraf se nahin kuchh khwahish thi
jaan ka apni kiya hum ne zarar aap se aap

ghair ko tum ne bithaya to nahin pahlu mein
aaj uthta hai ye kyon dard-e-jigar aap se aap

jazb-e-ulfat teri tasir ka tab qail hun
den to wo bosa-e-lab mujh ko magar aap se aap

lillah al-hamd kiya aah ne itna to asar
be-talab wo chale aae mere ghar aap se aap

hogi tasir jo nalon mein tumhaare 'wahbi'
to chala aaega wo rashk-e-qamar aap se aap