ishq ki baat wafaon ki kahani rakh de
ho gai aaj har ek rasm purani rakh de

muntazir hai meri peshani kisi suraj ki
apne honton se jo tu ek nishani rakh de

guftugu meri mera dost samajhta hi nahin
us ke dil mein mere lafzon ke maani rakh de

wo bhi sairab hon sadiyon se jo pyase hi rahe
khushk sahraon mein dariyaon ka pani rakh de

main 'sharar' bolun to aiwan-e-siyasat jal jae
mere alfaz mein wo shoala-bayani rakh de