ishq ki koi agar sikh le gar mujh se tamiz
din-duniya mein hua apne parayon ko aziz

ya ho shagird mera ya mujhe talmiz kare
warna is kucha-e-ushshaq se kar jawe gurez

maktab-e-ishq se na-khwanda utha jo mahrum
dono aalam mein wo kuchh chiz nahin hai nachiz

mard kyunkar kahun be-ishq jo howe koi
firqa ushshaq mein us ke tain kahte hain kaniz

main ne ustad-e-azal se yahi sikha tha sabaq
'afridi' na kabhi yar ki chhodun dahliz