ishq manus-e-iltija na hua
husn aazurda-e-jafa na hua

jaisa chaha bana liya tum ne
ek khilauna hua khuda na hua

but khuda ban ke bar bar aae
main hi sharminda-e-dua na hua

sab ghalat-fahmiyan hi mit jatin
dil saza-war-e-iltija na hua

hae majburiyan mohabbat ki
main khafa ho ke bhi khafa na hua

jaane la kar kahan dubo deta
khair guzri wo nakhuda na hua

aabru ka teri khayal aaya
mujh ko marne ka hausla na hua